خيرپور (ڊر) آل سنڌ سنگيتڪار ايسوسئيشن پاران استاد منظور علي خان ميوزيڪل اڪيڊمي خيرپور ۾ ثقافتي ڏهاڙي جي حوالي سان تقريب ٿي، جنهن جي صدارت آسا جي مرڪزي چيئرمين استاد عبدالغفور سومرو ڪئي. تقريب ۾ اڪيڊمي جا شاگرد، شاعر ۽ فنڪار روايتي ثقافتي لباس، اجرڪ ۽ ٽوپيون پهري پهتا. تقريب ۾ آسا چيئرمين استاد عبدالغفور سومرو سنڌ جي ثقافت ۽ موسيقي جي تاريخ تي روشني وجهندي چيو ته راڳ به ثقافت جو حصو آهي ۽ موسيقيءَ کانسواءِ ثقافت اڌوري آهي. هن چيو ته سنڌ ڌرتي جي ثقافت، تهذيب ۽ تمدن تمام پراڻو ۽ شاهوڪار آهي انهن سان هٿ چراند جي ڪنهن کي به اجازت نه ڏني ويندي، دعا آهي ته سنڌ ڌرتي ۽ ان جا ماروئڙا سکيا ستابا ٿين ۽ سنڌ هميشه آباد رهي. تقريب ۾ شريف عباسي، رخسانه سورٺ، ھير ماروي سنڌي ۽ ٻين گيت ڳائي سُرن ۽ آلاپن سان سنڌ امڙ کي ڀيٽا پيش ڪئي. ان موقعي تي آسا جي مرڪزي ڪميٽي جي ميمبرن آفتاب بخاري، عنايت ٻرڙو، حسيب احمد، ماسٽر سارنگ، لياقت منڱڻهار ۽ ٻين پڻ خطاب ڪيو، جڏهن ته شاعر احمد علي مسافر ڌرتيءَ جي حوالي سان پنهنجي نڪور شاعري پڙهي خوب داد ماڻيو.
