تحريڪ لبيڪ پاڪستان (ٽي ايل پي) پاران ڪراچي ۾ مهانگائي خلاف احتجاجي مارچ ڪيو ويو.
تحريڪ لبيڪ پاڪستان تحت ڪراچي ايئرپورٽ کان قائد اعظم جي مزار تائين مهانگائي خلاف مارچ ڪيو ويو، جنهن ۾ ٽي ايل پي ڪارڪنن وڏي انگ ۾ گاڏين ۽ موٽرسائيڪلن کانسواءِ پيادل شرڪت ڪئي، جنهن ڪري شاهراهه فيصل تي ٽريفڪ جام رهي ۽ شهرين کي سخت ڏکيائين جو منهن ڏسڻو پيو.
مارچ تحريڪ ليبڪ اڳواڻ سعد رضوي جي قيادت ۾ شاهراهه فيصل ۽ شاهراهه قائدين کان ٿيندو قائد اعظم جي مزار خدا داد ڪالوني پهتو.
شرڪت ڪندڙ کي خطاب ۾ سعد رضوي حڪومت ۽ اپوزيشن تي تنقيد ڪندي چيو ته عمران خان ڪهڙي وات سان چئي ٿو هن اسلام فوبيا لاءِ سڄي دنيا ۾ آواز اٿاريو، جنهن عمران خان کي قوم آخري اميد سمجهندي هئي اهو اڄ گھٽين ۾ گھمي رهيو آهي.
سعد رضوي جو چوڻ هو ته قوم مهانگائي ۾ پيسجي وئي پر اپوزيشن ڪجهه نه ڪيو ۽ اقتدار جي روشني نظر ايندي ئي اپوزيشن گڏ ٿي وئي، هاڻي عمران خان کي وڃڻو پوندو پر ميدان چورن لاءِ خالي نه ٿيندو.
