ڪراچي: سنڌ جي وڏي وزير مراد علي شاهه چيو آهي ته سامونڊي طوفان سبب سامونڊي پٽي مان ماڻهن کي ڪڍڻ جو سلسلو رات دير تائين جاري رهيو.
هڪ بيان ۾ مراد علي شاهه چيو ته 13 هزار ٻلين جي آبادي خطري ۾ آهي، جن مان 3 هزار ماڻهن کي رات جي وقت محفوظ هنڌن ڏانهن منتقل ڪيو ويو.
هن چيو ته غوربداري جا 5 هزار ماڻهو خطري ۾ آهن، جن مان 100 ماڻهن کي محفوظ هنڌن ڏانهن منتقل ڪيو ويو آهي، جڏهن ته شهيد فاضل راهو مان 3 هزار ماڻهن کي منتقل ڪيو ويو آهي.
مراد علي شاهه جو چوڻ آهي ته بدين جي 2500 جي آبادي کي طوفان جو خطرو آهي، جن مان 540 ماڻهن کي محفوظ هنڌن ڏانهن منتقل ڪيو ويو آهي.
سنڌ جي وڏي وزير چيو ته شاهه بندر جا 5 هزار ماڻهو طوفان جي زد ۾ آهن، جتان 90 ۽ جاتي مان 10 هزارن مان 100 ماڻهن کي رات دير سان محفوظ هنڌن ڏانهن منتقل ڪيو ويو آهي.
هنن جو اهو به چوڻ آهي ته کاروڇاڻ جي 1300 ماڻهن جي آبادي خطري ۾ آهي، جن مان 6 ماڻهن کي رات دير سان محفوظ هنڌ منتقل ڪيو ويو آهي.
سنڌ جي وڏي وزير مراد علي شاهه چيو آهي ته طوفان دوران شهرين کي گهرن ۾ رهڻ جي اپيل ڪئي وئي آهي.
سندس چوڻ آهي ته مان ٺٽي سجاول جي ساحلي پٽي جو دورو ڪيو آهي، ڪراچي سميت سڄي صوبي ۾ بل بورڊز هٽائڻ جي سختي سان هدايت ڪئي آهي.
