قومي احتساب بيورو (نيب) اسلام آباد هاءِ ڪورٽ پاران 19 ڪروڙ پائونڊ ريفرنس ۾ پاڪستان تحريڪ انصاف جي باني عمران خان جي ضمانت واري فيصلي کي سپريم ڪورٽ ۾ چئلينج ڪري ڇڏيو آهي
190 ملين پائونڊ ريفرنس ۾ پاڪستان تحريڪ انصاف جي باني عمران خان جي ضمانت رد ڪرڻ لاءِ سپريم ڪورٽ ۾ درخواست داخل ڪئ وئي
نيب جي درخواست ۾ چيو ويو آهي ته اسلام آباد هاءِ ڪورٽ جو 14 مئي جو فيصلو ڪالعدم قرار ڏنو وڃي ۽ ڪيس جو فيصلو اچڻ تائين اسلام آباد هاءِ ڪورٽ جو فيصلو معطل ڪيو وڃي
درخواست ۾ موقف اختيار ڪيو ويو ته اسلام آباد هاءِ ڪورٽ ٽرائل ڪورٽ جا اختيار استعمال ڪيا، اسلام آباد هاءِ ڪورٽ ٽرائل ڪورٽ وانگر شاهدن جا بيان نٿي وٺي سگهي، هاءِ ڪورٽ حقيقتن جو صحيح اندازو ناهي لڳايو.
درخواست ۾ القادر ٽرسٽ لاءِ رقم جي منتقلي جا تفصيل لکيا ويا آهن ۽ اسلام آباد هاءِ ڪورٽ جي ضمانت منظور ڪرڻ واري طريقيڪار تي 9 سوال اٿاريا ويا آهن
درخواست جي متن ۾ چيو ويو آهي ته تحريڪ انصاف جي باني خلاف ريفرنس ڪرپشن، بدعنواني تي جوڙيو ويو، سندس خلاف ريفرنس آئين، نيب آرڊيننس کي نظر ۾ رکندي ٺاهيو ويو.
درخواست ۾ چيو ويو آهي ته اسلام آباد هاءِ ڪورٽ شاهدن جي شاهدين کي ناقابل اعتبار قرار ڏئي ڇڏيو، جيڪو اصل ۾ ٽرائل ڪورٽ جو اختيار آهي
واضح رهي ته 15 مئي تي اسلام آباد هاءِ ڪورٽ 19 ڪروڙ پائونڊ اسڪينڊل ڪيس ۾ پاڪستان تحريڪ انصاف جي باني عمران خان جي ضمانت منظور ڪئي هئي
