اسلام آباد: (بيورو رپورٽ) وفاقي توانائي واري وزير سردار اويس لغاري چيو آهي ته هو آءِ پي پيز جي معاملي تي جماعت اسلامي جي امير حافظ نعيم الرحمان سان کليل مناظري جي لاءِ تيار آهي.
نجي چينل سان ڳالهيون ڪندي توانائي واري وفاقي وزير سردار اويس لغاري چيو ته مان حافظ نعيم سان کليل مناظري جي لاءِ تيار آهيان پر ٿي سگهي ٿو ته سٺيون خبرون اچڻ شروع ٿي وڃن ۽ هو پهريان ئي ڌرڻي مان اٿي هليا وڃن.
ب
سردار اويس لغاري چيو ته آءِ پي پيز جي معاملي کي اجاگر ڪرڻ تعريف جوڳو عمل آهي پر انهي تي سياست ڪرڻ مناسب عمل نه آهي. ٻئي طرف جماعت اسلامي جي امير حافظ نعيم الرحمان ڌرڻي ۾ شرڪت ڪندڙن کي خطاب ڪندي چيو ته عوام کي رليف ڏيڻ اسان جي سياست آهي، حڪومت بجلي جي بلن جي مد ۾ عوام کي رليف ڏئي بجيٽ ۾ پگهاردار طبقي کي جيڪي تڪليفون ڏنيون ويون آهن انهي تي نظرثاني ٿيڻ گهرجي، حڪومت کي هاڻ عوام کي رليف ڏيڻو پوندو.
حافظ نعيم الرحمان چيو ته هو آءِ پي پيز جنهن جو تعلق حڪومت سان آهي ان جي ڪيپسٽي پيمنٽ ته هينئر ئي ختم ٿي سگهي ٿي، اضافي ٽيڪس ۽ اءِ پي پيز ڪيپسٽي پيمنٽ عوام ادا نه ڪندي، آءِ پي پيز سان ڪيل معاهدن تي نظر ثاني ڪئي وڃي. ماڻهن موٽر سائيڪلون وڪرو ڪري بجلي جا بل ادا ڪيا آهن، حڪومت پنهنجون مراعتون گهٽ ڪري عوام کي رليف ڏئي.
