بئريسٽر اعتزاز احسن جو چوڻ آهي ته وڏي ڳالهه آهي ته حڪومت 7 رڪني بينچ جي ڳالهه نه مڃي رهي آهي، سوچيو به نه هو ته بچاءَ وارو وزير ۽ وزيراعظم ائين چوندا، جيڪڏهن توهين عدالت لڳي ته هي پنهنجي عهدن تي نه رهندا. .
فوجي عدالت ۾ سول ٽرائل خلاف درخواستگذار بئريسٽر اعتزاز احسن ۽ لطيف کوسا سپريم ڪورٽ ٻاهران ميڊيا سان ڳالهه ٻولهه ڪئي.
ان موقعي تي اعتزاز احسن چيو ته سپريم ڪورٽ بابت اهڙي ڳالهه ٻولهه نه ٿيڻ گهرجي، اسان درخواست ڪئي هئي ته فل ڪورٽ جوڙي وڃي.
لطيف کوسا چيو ته فوجي عدالتون آئين خلاف آهن، آرمي ايڪٽ سولين تي لاڳو نٿو ٿئي، آرمي ايڪٽ 1952ع ۾ فورسز جي ملازمن جو ذڪر آهي، ايوب خان اهي شقون 1967ع ۾ آنديون، فاطمه جناح ۽ 65ع جي جنگ کانپوءِ اهي شقون لڳايون ويون.
لطيف کوسا وڌيڪ چيو ته سمورا انگ اکر جج آڏو رکيا وڃن، هزارين ماڻهن کي گرفتار ڪيو ويو آهي، عطا تارڙ جواب ڏيڻ جي قابل ناهي، شهيد راڻي بينظير ڀٽو فوجي عدالتن جي مخالفت ڪئي هئي.
