بلوچستان ڪابينا صوبي جي سمورن هاءِ ويز تان سيڪيورٽي چوڪيون هٽائڻ جو حڪم ڏئي ڇڏيو، وڏي وزير عبدالقدوس بزنجو جي سربراهيءَ ۾ ڪابينا جي اجلاس دوران فيصلي جي منظوري ڏني وئي، ڪابينا پاران سمورن وفاقي توڙي صوبائي ادارن کي هاءِ ويز تان چوڪيون هٽائڻ جي هدايت ڪئي وئي
صوبائي ڪابينا پنهنجي هدايتن ۾ چيو آهي ته آئنده ڪو به ادارو بلوچستان سرڪار جي اجازت کانسواءِ چوڪيون قائم نه ڪندو، ڪابينا جي اجلاس ۾ امن امان جي صورتحال جو جائزو به ورتو ويو
چوڪين واري معاملي تي بحث دوران چيو ويو ته چوڪين تي بسن ۽ گاڏين ۾ سوار عورتن، ٻارن، مريضن ۽ پيرسن ماڻهن کي ڪلاڪن جا ڪلاڪ روڪيو وڃي ٿو
صوبائي ڪابينا پاران چيو ويو ته ڪنهن کي به شهرين کي هيسائڻ جي اجازت نه ڏني ويندي، شهرين جي عزت ۽ احترام يقيني بڻائڻ لاءِ سمورا قدم کنيا ويندا
