وفاقي حڪومت ڪالعدم تحريڪ لبيڪ پاڪستان (ٽي ايل پي) جي احتجاجين کي جي ٽي روڊ تي روڪڻ جو فيصلو ڪري ورتو.
وزيراعظم عمران خان جي صدارت هيٺ وفاقي ڪابينا جو اجلاس ٿيو، جنهن ۾ ملڪي سياسي ۽ معاشي صورتحال تي خيالن جي ڏي وٺ ڪئي وئي.
ذريعن موجب وزيراعظم کي ٽي ايل پي جي احتجاجي مارچ تي بريفنگ ڏني وئي ۽ فيصلو ڪيو ويو ته احتجاج ڪندڙن کي جهلم کان اڳتي وڌڻ نه ڏنو ويندو.
ذريعن جو چوڻ آهي ته وفاقي ڪابينا کي بريفنگ ڏني وئي ته جهلم پل تي رينجرز مقرر ڪئي وئي آهي.
ذريعن موجب وزيراعظم ڪالعدم تنظيم جا مطالبا نه مڃڻ جو فيصلو ڪيو، جڏهن ته وفاقي ڪابينا رياست جي رٽ قائم رکڻ جو به فيصلو ڪيو.
ذريعن جو چوڻ آهي ته حڪومت احتجاج ڪندڙن کي جي ٽي روڊ تي روڪڻ جو فيصلو ڪيو ۽ وزيراعظم شهرين جا رستا روڪيندڙن کي سختي سان منهن ڏيڻ جي هدايت ڪئي آهي.
