ميڊيڪل رپورٽ موجب عمران خان جي ذهني حالت تي سواليه نشان آهي، عبدالقادر پٽيل

صحت واري وفاقي وزير عبدالقادر پٽيل چيو آهي ته عمران خان جي ابتدائي ميڊيڪل رپورٽ ۾ انڪشاف ٿيو آهي ته هو شراب ۽ ڪوڪين جو استعمال ڪندو رهيو آهي.

ڪراچي ۾ پريس ڪانفرنس ڪندي عبدالقادر پٽيل چيو ته جمهوري حڪومت ۾ هر دستاويز عوامي دستاويز هوندو آهي، گرفتاري کانپوءِ عمران خان کي پمز اسپتال نيو ويو.

هن چيو ته پمز اسپتال ۾ عمران خان لاءِ ميڊيڪل بورڊ به جوڙيو ويو، ان موقعي تي پي ٽي آءِ چيئرمين جي پيشاب جو نمونو به ورتو ويو.

وفاقي وزير وڌيڪ چيو ته شروعاتي رپورٽ ۾ انڪشاف ٿيو آهي ته عمران خان جي نمونن ۾ شراب ۽ ڪوڪين جا جزا مليا آهن.

هن چيو ته ڄاڻايل شخص پنجن ڇهن مهينن تائين پلستر لڳائي گهمندو رهيو پر ميڊيڪل رپورٽ ۾ ڪا به فريڪچر نه آئي.

هن چيو ته رپورٽ ۾ اهو به چيو ويو آهي ته پي ٽي آءِ چيئرمين جي ذهني حالت سواليه نشان آهي، عمران خان جون حرڪتون ڪنهن فٽ انسان جون نه هيون.