دبئي ۾ نوڪري: احتياطي تدابير ۽ صحيح معلومات جي اهميت

سهيڙيندڙ: سنهري شيخ

ڪافي وقت کان منهنجا ڪجهه دوست ۽ جونيئر مون سان رابطو ڪري رهيا آهن ۽ ٻڌائي رهيا آهن ته اهي ٻاهرين ملڪن ۾ نوڪري لاءِ اپلاءِ ڪري رهيا آهن. جڏهن ڪو ماڻهو اهڙي ڪوشش ڪري ٿو ته ان لاءِ ضروري آهي ته هو ان ملڪ ۾ رهندڙ دوستن يا ڄاتل ماڻهن سان مشورو ڪري. گذريل ۲–۳ سالن ۾ ڪافي پاڪستاني نوجوان ٻاهرين ملڪن ڏانهن نڪري ويا آهن، ڇو ته انهن جي سوچ آهي ته وڌيڪ ڪمائي پنهنجي ۽ پنهنجي خاندان جو مستقبل محفوظ بڻائي سگهجي ٿو. اهو هڪ بهترين خيال آهي ۽ انهن نوجوانن جي همت کي سلام پيش ڪريان ٿي، جيڪي پنهنجو گهر ۽ پنهنجا پيارا ڇڏي پرديس ۾ وڃي، پنهنجي ۽ پنهنجي گهر وارن کي سپورٽ ڪن ٿا.

دبئي سياحت سان گڏوگڏ نوڪري جي تلاش ۽ پروفيشنل ڊولپمينٽ لاءِ پڻ هڪ بهترين هنڌ آهي. هي ملڪ محفوظ ترين ملڪن ۾ شمار ٿئي ٿو ۽ اڪيلين عورتن لاءِ به بيحد محفوظ سمجهيو وڃي ٿو، جنهن ڪري هرڪو هتي اچڻ ۽ زندگيءَ کي بهتر بڻائڻ چاهي ٿو. دبئي ۾ نوڪري ڳولڻ ڪجهه مهارت طلب ڪم آهي. جيڪڏهن ڪو سٺو طريقي سان سمجهي وڃي، ته هو بنا ڪنهن وڏي مشڪل جي ڪامياب ٿي سگهي ٿو. پر افسوس جو ڪجهه پاڪستاني نوجوان، جيڪي هتي نوڪريءَ جي آسري اچن ٿا، فراڊ جو شڪار ٿي وڃن ٿا يا انهن جون ڪجهه غلطيون انهن کي واپس موٽڻ تي مجبور ڪري ڇڏين ٿيون.

ڪجهه وقت اڳ، جڏهن مان پاڪستان واپس وئي هئس، ته هڪ پراڻي سڃاڻپ واري عورت مون سان ملڻ آئي ۽ ٻڌايو ته هن جو پٽ ڪجهه وقت اڳ دبئي ويو هو ۽ هاڻ اتي ڦاسي پيو آهي. ڇوڪرو فيس بڪ تي ڪنهن دوست سان رابطي ۾ هو، جنهن کيس چيو ته وزٽ ويزا تي دبئي اچ، هتي نوڪري لاءِ مدد ڪندس. غريب هجڻ، پڙهيل لکيل نه هجڻ، ۽ پئسا ڪمائڻ جي آسري، هو ڇوڪرو دبئي پهتو. پر جڏهن هو پهتو، ته سندس حالت خراب ٿي وئي، هن کي ڪمري جو ڪرايو ڀرڻو پيو، نوڪري نه ملي، ۽ وزٽ ويزا ختم ٿيڻ لڳي، جنهن کان پوءِ ساٿي هن کي ڇڏي ڏنو. گهر وارا پريشان ٿي مون سان صلاح ڪرڻ آيا.

مون انهن کي سمجهايو ته ڪوشش ڪريو ته ڇوڪرو پاڻ وڃي نوڪري ڳولهي سگهي ٿو. پر جيڪڏهن ضرورت آهي ته کيس واپس گهرائي ڇڏين. مون افسوس ڪيو ته هي ڇوڪرو نادانيءَ ۾ ڌوڪيبازيءَ ۾ ڦاسي پيو ۽ پنهنجي غلط فيصلن سان تڪليف ۾ اچي ويو. توهان کي ٻڌائيندي هلان ته  دبئي ۾ نوڪري ملڻ کان پوءِ هڪ آفر ليٽر ملندو آهي.

اهو هڪ مثال آهي، پر اڪثر پاڪستاني نوجوانن کي اهڙين حالتن کي منهن ڏيڻو پوي ٿو. دبئي ۾ حڪومتي قاعدا ۽ ضابطا موجود آهن، پر شرط اهو آهي ته ان ملڪ جي پاليسين کي سمجهي، تڏهن ئي ٻاهرين ملڪ ۾ ڪاميابي سان رهي سگهجي ٿو. ٻيهر چوڻ جو مقصد اهو آهي ته، جڏهن به ڪنهن ملڪ ۾ نوڪري لاءِ اپلاءِ ڪيو، خاص طور تي آن لائن پورٽلز جهڙوڪ LinkedIn، Gulfjobs، ۽ Indeed تي، ته ان ملڪ جي قانونن، پاليسين، ۽ نوڪريءَ جي حالتن تي مڪمل تحقيق ڪريو.

وزٽ ويزا تي نوڪري ڳولهڻ کان پاسو ڪريو، ۽ جيڪڏهن اچو ٿا ته ايمرجنسي لاءِ ڪيش لازمي رکو. ايئرپورٽ تي رهائش جي ثابتي ۽ ڪيش ڏيکارڻ لاءِ به چڪاس ڪئي ويندي، ان  ڪري تياري سان اچو. دبئي ۾ اڪثر پاڪستاني نوجوانن کي فراڊ جون شڪايتون ٿينديون آهن، جنهن سبب دبئي حڪومت ڪافي پريشان آهي. ان جو چٽو سبب اهو آهي ته اهي مڪمل تحقيق نٿا ڪن ۽ شارٽ ڪٽس جي تلاش ۾ هوندا آهن.

آخر ۾ اهو ئي چوندس ته پنهنجي سي وي کي تخليقي ۽ فيلڊ سان لاڳاپيل بڻايو. آن لائن مختلف نمونا موجود آهن، جن کي ڏسي مدد ملي سگهي ٿي. مناسب تحقيق ۽ پلاننگ سان اڳتي وڌڻ جو سفر آسانيءَ سان طئي ڪري سگهجي ٿو، ۽ ڌوڪيبازن کان به بچي سگهجي ٿو.