لاهور هاءِ ڪورٽ جهانگير ترين جي شگر ملز جي درخواست تي حڪومت کي مشروط طور شگز ملز خلاف ايندڙ ٻڌڻي تائين تاديبي ڪارروائي کان روڪي ڇڏيو.
لاهور هاءِ ڪورٽ ۾ پي ٽي آءِ اڳواڻ جهانگير ترين جي شگر ملز کنڊ اگهه مقرر ڪرڻ خلاف درخواست داخل ڪئي، جنهن ۾ وفاقي ۽ صوبائي حڪومت سميت ٻين کي ڌر بڻايو ويو.
درخواست ۾ موقف اختيار ڪيو ويو ته هاءِ ڪورٽ کنڊ جو ريٽ مقرر ڪرڻ کان اڳ شگر ملز مالڪن جو موقف ٻڌڻ جو حڪم ڏنو هو پر عدالتي حڪم باوجود درخواست گذارن کي ٻڌو ئي نه ويو ۽ حڪومت کنڊ جي نئين قيمت 89.50 رپيا مقرر ڪرڻ جو نوٽيفڪيشن جاري ڪيو.
درخواست ۾ اپيل ڪئي وئي ته حڪومت جي مقرر اگهه تي کنڊ کپائڻ ممڪن ناهي، تنهن ڪري کنڊ جي قيمت 89.50 رپيا مقرر ڪرڻ جو حڪومتي نوٽيفڪيشن ڪالعدم قرار ڏنو وڃي.
