سڄي ملڪ ۾ ٻنهي جهانن جي سردار رحمت العالمين حضرت محمد مصطفيٰ صه جي ولادت جو جشن عقيدت ۽ احترام سان جوش ۽ جذبي سان ملهايو ويو.
اڄ 12 ربيع الاول جي موقعي تي ڏينهن جي شروعات تي گادي واري هنڌ اسلام آباد ۾ 31 ۽ صوبائي گادي واري هنڌن ۾ ايڪويهه ايڪويهه توپن جي سلامي ڏني وئي، جڏهن ته لاهور جي ايوب اسٽيڊيم ۾ پاڪ فوج جي دستي توپن جي سلامي ڏني.
جشنِ عيد ميلاد النبي صه جي موقعي تي هر گهر هر گهٽي کي روشنين سان سينگاريو ويو آهي، مک خانگي ۽ سڪاري عمارتون، مسجدون ۽ علائقا خوبصورت رنگ برنگي روشني واري لائيٽن سان سجايا ويا.
ان حوالي سان ملڪ جي هر ننڍي توڙي وڏي شهر ۾ جلوس ڪڍيا پيا وڃن، مختلف تقريبن ۾ عالم سڳورا حضور صلعم جن جي پاڪ زندگي تي روشني وڌي.
ڪراچي ۾ جشن عيد ميلاد النبي صه جو مرڪزي ميڙاڪو نشتر پارڪ ۾ ڪوٺايو ويندو ۽ جماعت اهل سنت جي تحت جلوس ميمڻ مسجد ايم اي جناح روڊ کان نڪرندو، جلوس جي سيڪيورٽي جي لاءِ پوليس ۽ رينجرز جي وڏي نفري مقرر ڪئي وئي.
عيد ميلاد النبي صه جي موقعي تي ڪراچي توڙي مختلف شهرن ۾ سيڪيورٽي خدشن کي نظر ۾ رکندي موبائل سروس معطل ڪئي وئي آهي. جڏهن ته سڄي سنڌ ۾ موٽرسائيڪل جي ٻيلهه سواري تي به پابندي لاڳو ڪئي وئي.
