سنڌ جي وڏي وزير مراد علي شاهه جي صدارت هيٺ ڪابينا جو اجلاس ٿيو، جنهن ۾ صوبائي وزيرن، صلاحڪارن، خاص مددگارن، چيف سيڪريٽري، چيئرمين پي اينڊ ڊي، پرنسپل سيڪريٽري ۽ ٻين لاڳاپيل آفيسرن شرڪت ڪئي.
بريفنگ دوران ٻڌايو ويو ته آءِ ٽي کاتي جي انهن پوسٽن ۾ ڪمپيوٽر آپريٽرز بي ايس 5 کان 10 تائين اپ گريڊ ڪري بي ايس 12، آئي ٽي سان لاڳاپيل ملازمن کي بي ايس 11 کان بي ايس 15 تائين اپ گريڊ ڪيو ويو آهي.
اجلاس ۾ ٻڌايو ويو ته گريڊ 16 ۾ شامل ملازمن کي بي ايس 17 ۾ اپ گريڊ ڪيو ويو آهي، 3264 ملازمن جي اپ گريڊيشن سان خزاني ۾ 243.706 ملين رپين جو اضافو ٿيو آهي، ڪابينا 3264 آئي ٽي پوسٽن جي اپ گريڊيشن جي منظوري ڏئي ڇڏي
سنڌ ڪابينا ڪورونا وائرس ايمرجنسي فنڊ بند ڪرڻ جي منظوري ڏئي ڇڏي، جنهن جو انتظام چيف سيڪريٽري جي سربراهي ۾ 6 رڪني ادارو ڪري رهيو هو.
ڪابينا کي ٻڌايو ويو ته 18 مارچ 2020 کان 21 اپريل 2021 تائين 17 اجلاسن دوران ڪورونا وائرس ايمرجنسي فنڊ ۾ 3312.93 ملين رپيا وصول ڪيا ويا، جڏهن ته فنڊ جو ڪل خرچ 3312.93 ملين رپيا رهيو.
اجلاس ۾ ٻڌايو ويو ته هن وقت ڪورونا وائرس ايمرجنسي فنڊ جي اڪائونٽ ۾ 35.7 ملين رپين کان وڌيڪ رقم موجود آهي.
سنڌ ڪابينا باقي رقم ٻوڏ متاثرن جي گهرن جي تعمير لاءِ خرچ ڪرڻ جي منظوري ڏئي ڇڏي.
سنڌ ڪابينا اقبال ڊيٿو کي سنڌ هيومن رائيٽس ڪميشن جو چيئرمين بڻائڻ جي به منظوري ڏئي ڇڏي آهي، ان کان اڳ ڪميشن جي چيئرپرسن جسٽس (ر) ماجده رضوي هئي.
