آمريڪي پرڏيهي کاتي جي ترجمان ويدانت پٽيل هن هفتي واشنگٽن ۾ ڊيموڪريسي سمٽ مان پاڪستان جي ڌار ٿيڻ جي فيصلي تي ردعمل ظاهر ڪندي چيو ته پاڪستان هڪ خودمختيار رياست آهي ۽ ان کي پنهنجا فيصلا ڪرڻ جو حق حاصل آهي.
واشنگٽن ۾ صحافين کي بريفنگ ڏيندي ويدانت پٽيل چيو ته پاڪستان جي فيصلي سان ٻنهي ملڪن جي لاڳاپن تي ڪو به اثر نه پوندو.
هن وڌيڪ چيو ته آمريڪا ۽ پاڪستان ڪيترن ئي معاملن تي گڏجي ڪم ڪري رهيا آهن ۽ اسان جمهوريت، انساني حقن ۽ مذهب جي آزادي سميت ٻين معاملن تي گڏجي ڪم ڪندا رهنداسين.
پاڪستان ۽ ڀارت سان آمريڪا جي لاڳاپن بابت هڪ سوال جي جواب ۾ هن چيو ته آمريڪا پاڪستان ۽ ڀارت سان پنهنجي مضبوط لاڳاپن کي قدر جي نگاهه سان ڏسي ٿو.
پاڪستان ۾ پابندي مڙهيل تنظيم ٽي ٽي پي پاران ڪيل دهشتگرد حملن ۾ واڌ جي حوالي سان ويدانت جو چوڻ هو ته اسان جي پاڪستان سان گهري سيڪيورٽي پارٽنرشپ آهي، جنهن ۾ دهشتگردي جي خلاف ڪوششون شامل آهن، مان تازن حملن جون رپورٽون ڏٺيون آهن، متاثرن سان تعزيت جو اظهار ڪندس.
