راولپنڊي ۾ کيڏجندڙ ٻئين ٽيسٽ ميچ جي ٻئي اننگز ۾ پاڪستاني بيٽنگ لائن هڪ دفعو ٻيهر ناڪام ٿي وئي آهي، 8 رانديگر آئوٽ ٿي ويا آهن.
ٻئين ٽيسٽ جي چوٿين ڏينهن جي شروعات ٿي ته ان وقت پاڪستان 2 وڪيٽن جي نقصان تي 21 رنسون ٺاهيون هيون، پاڪستان جي اڌ ٽيم صرف 65 رنسن تي آئوٽ ٿي وئي.
صائم ايوب 20، شان مسعود 29 ۽ بابر اعظم 11 رنسون ٺاهي آئوٽ ٿيا، شڪيل مسعود، محمد رضوان جو ساٿ ڏيڻ جي لاءِ آيو پر اهو به 2 رنسون ٺاهي آئوٽ ٿي ويو. محمد رضوان 38 رنسون جڏهن ته سلمان آغا 7 رنسن سان ڪريز تي موجود هئا، بنگلاديش جي بالرز سامهون ڪوبه پاڪستان جو رانديگر بهتر ڪارڪردگي نه ڏيکاري سگهيو.
پاڪستاني بيٽنگ لائن پريشانين جو شڪار آهي، پاڪستان ماني جي وقفي تائين ڇهن وڪيٽن جي نقصان تي 117 رنسون ٺاهيون اهڙي طرح بنگلاديش جي پهرين اننگز تي پاڪستان کي گڏيل طور تي 129 رنسن جي برتري حاصل هئي.
ماني جي وقفي کان پوءِ راند شروع ٿي ته محمد رضوان پنهنجي اسڪور ۾ وڌيڪ پنجن رنسن جو اضافو ڪيو ۽ 43 رنسن تي حسن محمد جي بال تي وڪيٽ ڪيپر کي ڪيچ ڏئي پويلين موٽي ويو.
سلمان آغا جو ساٿ ڏيڻ جي لاءِ محمد علي آيو پر اهو پهرين بال تي ئي آئوٽ ٿي ويو. هن وقت سلمان آغا 18 رنسون ٺاهيون آهن ۽ انهي سان گڏ ابرار احمد 2 رنسن سان ڪريز تي موجود آهي پاڪستان 8 وڪيٽن جي نقصان تي 139 رنسون ٺاهيون آهن، اهڙي طرح گڏيل طور تي 151 رنسن جي برتري حاصل آهي.
بنگلاديش طرفان ناهيد رانا 3، حسن محمد 4، جڏهن ته تسڪين احمد هڪ رانديگر کي آئوٽ ڪيو آهي.
