خيرپور (ڊر) خيرپور جي ماڊل ڪورٽ قتل ڪيس ۾ ملوث ٽن ڀائرن کي عمر قيد ۽ هڪ، هڪ لک روپيه ڏنڊ جي سزا ٻڌائي ڇڏي. خبر موجب خيرپور ۾ تڪڙا ڪيس اڪلائڻ لاءِ قائم ڪرمنل ماڊل ٽرائيل ڪورٽ جي اسپيشل جج گل ضمير سولنگي جي عدالت احمدپور ٿاڻي جي هڪ قتل ڪيس ۾ ملوث ٽن ڀائرن نثار احمد، خالد ۽ عبدالجبار ولد محمد نواز غوري مٿان ڏوهه ثابت ٿيڻ تي کين عمر قيد ۽ هڪ، هڪ لک روپيه ڏنڊ جي سزا ٻڌائي کين پوليس جي سخت پهري هيٺ سينٽرل جيل خيرپور اماڻي ڇڏيو. ڏنڊ جي رقم ادا نه ڪرڻ جي صورت ۾ جوابدار وڌيڪ ڇهه، ڇهه مهينا قيد ڀوڳيندا. جوابدارن مٿان الزام هيو ته هنن 5 مارچ 2011 تي احمدپور ٿاڻي جي حد حاجنا شاهه ۾ ڳوٺ اندر ايندڙ ويندڙ رستي مان گذرڻ جي ڳالهه تان ناراض ٿي 30 ساله نوجوان غلام فريد ولد نور محمد غوري کي فائرنگ ڪري قتل ڪري ڇڏيو هيو. ساڳي ڪيس ۾ جوابدار ڄاڻايل راشد ۽ سندس ڀاءُ خادم حسين غوري کي عدالت بي ڏوهي قرار ڏيندي آزاد ڪري ڇڏيو.
