خيرپور (ڊر) صوبائي محتسب اعليٰ سنڌ اعجاز علي جي خاص هدايتن تي ريجنل ڊائريڪٽر محتسب اعليٰ خيرپور، خيرپور ميونسپل ڪميٽي آڪٽرا جي سپرينٽنڊنٽ عبدالواحد خاصخيلي ۽ رٽائرڊ ڪلرڪ محمد بخش نيازي پاران رٽائرمنٽ کان پوءِ کاتي پاران رهتن جي ادائيگي نه ٿيڻ تي ريجنل ڊائريڪٽر صوبائي محتسب خيرپور جي آفيس ۾ درخواست داخل ڪئي هئي. صوبائي محتسب جي ريجنل آفيسر غلام قاسم بلوچ درخواست تي شنوائي ڪندي ميونسپل ڪاميٽي خيرپور جي ذميوار آفيسرن کي گهرائي سپريٽنڊنٽ عبدالواحد خاصخيلي ۽ رٽائرڊ ڪلرڪ محمد بخش نيازي کي فوري ادائيگي ڪرڻ جو حڪم ڏنو، ميونسپل ڪاميٽي خيرپور پاران رٽائرڊ ڪلرڪ محمد بخش نيازي جي 6 لک 74 هزار 543 جي رهتن مان هڪ لک ۽ رٽائرڊ سپريٽنڊنٽ عبدالواحد خاصخيلي کي 17 لک 28 هزار 470 مان هڪ لک روپين جو چيڪ صوبائي محتسب جي آفيسر حوالي ڪيو، جنهن ٻنهي رٽائرڊ ملازمن کي پنهنجي آفيس ۾ گهرائي چيڪ ڏنا ۽ بقايا رقم جي ادائيگي لاءِ ميونسپل ڪاميٽي خيرپور جي آفيسر ايندڙ فنڊن مان رهتون ادا ڪرڻ جو يقين ڏياريو.
