سنڌ ۾ نادرا جا وڌيڪ 3 ميگا سينٽر قائم ڪرڻ جو فيصلو ڪيو ويو آهي، جن مان ٻه ميگا سينٽر ڪراچي ۽ هڪ حيدرآباد ۾ قائم ڪيو ويندو.
نادرا اختيارين موجب ميگا سينٽرن تي ٻن شفٽن ۾ قومي سڃاڻپ ڪارڊ ٺاهڻ جون سهولتون فراهم ڪيون وينديون.
اختيارين ٻڌايو ته ڪراچي جي اوڀر۽ ملير ضلعي ۾ هڪ، هڪ ميگا سينٽر ٺاهڻ جو فيصلو ڪيو ويو آهي، جڏهن ته لياقت آباد ۽ ڪورنگي نادرا رجسٽريشن سينيٽر ٻن شفٽن ۾ ڪم ڪندا.
نادرا اختيارين موجب اهو فيصلو به ڪيو ويو آهي ته وارثتي سرٽيفڪيٽ جاري ڪرڻ لاءِ عوامي مرڪز ۾ هڪ خاص سينٽر قائم ڪيو ويندو، ان کانسواءِ شهر ۾ 4 ايم آر وين (موبائل رجسٽريشن وين) جي واڌ ڪئي وئي آهي، نادرا جي وڌيڪ 4 ايم آر وين جي شموليت کانپوءِ ڪراچي جو مجموعي فليٽ 23 ٿي ويو.
هوڏانهن ٺٽي ضلعي جي تعلقي گهوڙا ٻاري، ميرپورخاص جي تعلقي سنڌڙي ۽ عمرڪوٽ جي تعلقي ساماري ۾ به نوان سينٽر قائم ڪيا ويندا.
حيدرآباد ۽ ڪراچي سميت ٻين شهرن ۾ اهي نوان منصوبا پورا ڪرڻ جي ڊيڊ لائن 31 ڊسمبر آهي.
