طالبان حڪومت افغانستان جي گادي واري هنڌ ۾ 2700 کان مٿي نشي جي عادي ماڻهن کي علاج لاءِ اسپتالن ۽ طبي مرڪزن ۾ منتقل ڪري ڇڏيو.
گهرو وزارت افغان ترجمان قاري سعيد خوستي ٻڌايو آهي ته گذريل ڏينهن منشيات کان روڪٿام واري کاتي ڪابل جي روڊن تان ڪيترائي نشئي ماڻهو کنيا ۽ انهن کي اسپتالن ۽ ٻين طبي مرڪزن ۾ علاج لاءِ داخل ڪرايو.
هن ٻڌايو ته علاج لاءِ منتقل ڪيل نشي جي عادي ماڻهن جو انگ 2700 کان مٿي آهي.
قاري سعيد خوستي چيو ته اسپتالن ۽ مرڪزن ۾ ڪيترن ئي ماڻهن کي علاج کانپوءِ ڊسچارج ڪيو ويو آهي، جڏهن ته سوين ماڻهو هاڻي به ماهر ڊاڪٽرن جي نگراني ۾ علاج هيٺ آهن.
ترجمان جو چوڻ هو ته طالبان حڪومت سياري جي موسم ۽ جاءِ جي کوٽ جي باوجود منشيات جي ماڻهن جو علاج جاري رکندي ۽ انهن ماڻهن جي گذر سفر جي لاءِ مناسب حل به ڳولڻ جي ڪوشش ڪري رهي آهي.
