بالي ووڊ ڪنگ شاهه رخ خان جي پٽ آريان خان منشيات ڪيس ۾ نارڪوٽڪس ڪنٽرول بيورو (اين سي بي) جي آفيس ۾ هفتيوار حاضري کان ڇوٽ حاصل ڪرڻ لاءِ ممبئي جي هاءِ ڪورٽ سان رابطو ڪري ورتو.
ڀارتي ميڊيا موجب نارڪوٽڪس ڪنٽرول بيورو (اين سي بي) 2 آڪٽوبر تي ممبئي جي سامونڊي ڪناري ويجهو هڪ ڪروز شپ تي ڇاپو هڻي منشيات استعمال ڪرڻ جي الزام ۾ آريان خان ۽ ٻين کي گرفتار ڪيو هو.
آريان خان کي تقريبن 20 ڏينهن تائين ممبئي جي آرٿر روڊ جيل ۾ رکيو ويو جنهن کان پوءِ 28 آڪٽوبر تي سندس ضمانت منظور ڪئي وئي.
رپورٽن موجب آريان جي ضمانت جي شرطن مان هڪ اها هئي ته کيس هر جمعي جي ڏينهن ممبئي ۾ نارڪوٽڪس ڪنٽرول بيورو جي آفيس ۾ حاضري ڏيڻي پوندي.
ڀارتي ميڊيا جو چوڻ آهي ته آريان خان ضمانت کان پوءِ جمعي تي ممبئي نارڪوٽڪس ڪنٽرول بيورو جي آفيس ۾ حاضري لاءِ ويندو آهي.
پر هاڻ رپورٽس سامهون اچي رهيون آهن ته آريان خان نارڪوٽڪس ڪنٽرول بيورو جي آفيس ۾ هفتيوار حاضري کان ڇوٽ حاصل ڪرڻ لاءِ ممبئي هاءِ ڪورٽ سان رابطو ڪيو آهي.
ميڊيا موجب آريان خان طرفان عدالت کي ڏنل درخواست ۾ چيو ويو آهي ته جيتوڻيڪ ڪيس جا جاچ اڃا دهلي اين سي بي جي خصوصي جاچ ٽيم کي منتقل ڪئي وئي آهي، ان ڪري ممبئي جي آفيس ۾ حاضري کان ڇوٽ ڏني وڃي.
ان کان سواءِ درخواست ۾ اهو به چيو ويو آهي ته جڏهن به آريان خان اين سي بي جي آفيس وڃي ته ٻاهر ميڊيا وارن جي وڏي انگ سبب هن سان گڏ پوليس اهلڪار هجن.
آريان جي وڪيلن جو چوڻ آهي ته درخواست جي ٻڌڻي هائيڪورٽ ۾ ايندڙ هفتي ٿيڻ جو امڪان آهي.
