وفاقي گهرو وزير شيخ رشيد چيو آهي ته نواز شريف بدنصيب انسان آهي، جيڪو پنهنجون جعلي رپورٽون ٺهرائي رهيو آهي ۽ ٻاهر رهڻ چاهي ٿو، دنيا ۾ اهڙو ڪو ليڊر ناهي، جيڪو پنهنجي ملڪ مان ڀڄي.
اسلام آباد ۾ پريس ڪانفرنس ڪندي شيخ رشيد چيو ته نواز شريف جعلي رپورٽ تي لنڊن ۾ رهڻ چاهي ٿو، چون ٿا ته ڪورونا سبب علاج نه پيو ڪرائي، اهي ماڻهن کي ڪورونا ۾ دوکو ڏيڻ چاهين ٿا، ڪورونا ۾ ماڻهن کي چون ٿا ته اسلام آباد اچو، اپوزيشن ڀلي پنهنجو شوق پورو ڪري، اپوزيشن جي رنگ پسٽن ۾ زنگ ويٺل آهي.
هن چيو ته روز افواهه پکيڙيا پيا وڃن، نه ڪو صدارتي نظام پيو اچي ۽ نه ڪا ايمرجنسي لڳندي، ڪو ڌرڻو نه لڳندو، نه بي اعتمادي رٿ ايندي، نه ڪا ڊيل ۽ نه ڪا ڍَر جي ڳالهه ٿي رهي آهي، ڪنهن کي بي اعتمادي رٿ آڻڻي آهي ته شوق پورو ڪري، ماڻهو انهن کي ئي آڻڻا آهن، ساڍن ٽن سالن ۾ اهڙو ڪو بل ناهي، جنهن ۾ حڪومت نه کٽي هجي.
سندس چوڻ هو ته ٽي ٽي پي دهشتگردي جي واقعن ۾ واڌ ڪئي آهي، اسلام آباد ۾ ٽي ٽي پي جا ٻه دهشتگرد ماريا ويا آهن، ٽي ٽي پي اهڙا معاملا ڪري رهي آهي، جيڪي عوامي حڪومت لاءِ قبولڻ جوڳا ناهن، امن امان جي صورتحال تي چئني صوبن جي چيف سيڪريٽرين ۽ آءِ جيز کي الرٽ ڪيو ويو آهي.
هڪ سوال جي جواب ۾ شيخ رشيد چيو ته سنڌ ۾ 13 پاسپورٽ سينٽر ٺاهڻ چاهيون ٿا، سنڌ حڪومت سان ڳالهه ڪئي آهي، سنڌ حڪومت جي ڪري دير ٿي رهي آهي.
