ڪراچي جي عوام صبح سوير جاڳندي ئي خوشگوار موسم جو نظارو ڪيو، ٿڌين هوائن سان گڏ برسات موسم بهتر بڻائي ڇڏي.
پهرين برسات طارق روڊ، بهادر آباد، شارع فيصل ۽ ملير ۾ پئي. نارٿ ڪراچي، نارٿ ناظم آباد ۽ صدر ۾ ڪجهه هنڌن تي گجگوڙ سان برسات پئي.
گلستان جوهر، ڊالميا، اورنگي ٽائون، بنارس، گلشن اقبال، عزيز آباد ۽ نيو ٽائون ۾ به تيز برسات پئي.
برسات کانپوءِ ڪجهه رستن تي گپ چڪ ٿي وئي، جڏهن ته برساتي پاڻي ڪيترن ئي هيٺاهين علائقن ۾ داخل ٿي ويو، جنهن سان ٽريفڪ جي رواني متاثر ٿي.
برسات سبب شهر جي مختلف علائقن ۾ بجلي جي فراهمي معطل ٿي وئي.
ان کان اڳ چيف ميٽولوجسٽ ڊاڪٽر سردار سرفراز جو چوڻ هو ته عربي سمنڊ مان برساتن جو سلسلو داخل ٿي ويو آهي، ايندڙ ڪلاڪن ۾ ڪراچي، ٺٽي ۽ حيدرآباد جي ضلعن ۾ وچولي کان تيز برسات پوڻ جو امڪان آهي.
موسميات کاتي اڳڪٿي ڪئي هئي ته برساتن جو نئون سلسلو 21 مارچ کان ملڪ ۾ داخل ٿيڻ جو امڪان آهي، جيڪو 23 مارچ تائين جاري رهندو.
