حيدرآباد (رپورٽ: نسيم احمد سھتو) قومي عوامي تحريڪ جي سربراھ اياز لطيف پليجي چيو آھي ته قانون جي حڪمراني نه ھجڻ ڪري قبيلائي دھشتگردي جو راڄ آھي، پ پ سرپرستي پئي ڪري.
پنهنجي جاري ڪيل بيان ۾ اياز پليجو چيو ته ڪرپٽ حڪمرانن ۽ سندن وحشي نظام سنڌ کي خونن، ڌاڙن، اغوائن، ٻوڙائڻ، پنائڻ، بدامني ۽ لاقانونيت سواءِ ڪجهه ناهي ڏنو.
هن چيو ته معمولي ڳالھين ۽ انتقام خاطر وڏي خوني جنگ شروع ٿيو وڃي، ھزارين خاندان تباھ ۽ لکين ايڪڙ زمين بنجر ٿي وئي.
سندس چوڻ هو ته تڪرار وارن ضلعن ۾ تعليمي نظام درھم برھم، بيروزگاري ۽ بدحالي جي ڪري ڏوھن جو راڄ آھي.
