پاڪستان مسلم ليگ(ن) جي اڳواڻ سينيٽر طلال چوڌري چيو آهي ته هڪ طاقتور اداري پنهنجي گهر کان احتساب جو عمل شروع ڪيو، ٻيا ادارا به ائين ڪن.
پنهنجي هڪ وڊيو بيان ۾ سينيٽر طلال چوڌري چيو ته خود احتسابي جو عمل هر اداري کي ڪرڻ گهرجي، رئوف حسن پرڏيهي صحافين سان رابطي ۾ هو، رئوف حسين پاڪستان مخالف صحافين کي حساس مواد ڏئي رهيو هو.
هن الزام لڳائيندي چيو ته انهي وقت ڪيترائي جج پلان موجب فيصلا ڪري رهيا هئا، اڳوڻو چيف جسٽس ثاقب نثار ڪوڙ ڳالهائي رهيو هو، سي پيڪ جي دوران ڄاڻي واڻي ڌرڻا هنيا ويا، انهي وقت ثاقب نثار اهڙا فيصلا ڪيا جنهن پاڪستان کي تمام گهڻو نقصان پهچايو.
طلال چوڌري چيو ته پاڪستان سالميت تي هاڻ ڪوبه سمجهوتو نه ڪيو ويندو، پي ٽي آءِ جي چئن سالن ۾ پاڙيسري ملڪن کي ناراض ڪيو ويو، رئوف حسن ۽ ڪورٽ مارشل جون ڳالهيون اڻپوريون آهن، چيف جسٽس آف پاڪستان به پنهنجي اداري ۾ بي رحم احتساب ڪري، سياسي اڳواڻن کي به مهرن خلاف ڪارروائي ڪرڻي پوندي.
هن چيو ته سمورن ادارن ۽ سياسي پارٽين کي احتساب جو حصو بنجڻو پوندو، اسان کي پاڪستان ۾ 2017 واري خوشحالي ٻيهر آڻڻي آهي، هڪ اداري بي رحم احتساب شروع ڪيو ٻين ادارن کي به ائين ڪرڻو پوندو، پاڪستان سڀني کان وڌيڪ اهم آهي، جيڪڏهن احتساب نه ٿيو ته حڪومت احتساب کي يقيني بنائيندي. ليگي اڳواڻ چيو ته ثاقب نثار فيض حميد سان رابطي ۾ رهندو هو. ٻئي ڄڻا سڄي ڏينهن ۾ ڪيترائي ڀيرا رابطو ڪندا هئا، ثاقب نثار جي فيصلن ملڪ کي انهي حال ۾ پهچايو. ملڪي معيشت کي نقصان پهچائي عوام جو معاشي استحصال ڪيو ويو، پي ٽي آءِ باني کي مڙهيو ويو، پاڪستان جي معيشت کي ڄاڻي واڻي ڪمزور ڪيو ويو.
هن وڌيڪ چيو ته رئوف حسن اڪيلو ماڻهو نه هو اهو هڪ پورو پلان هو، انهي جا نشان پي ٽي آءِ باني سان ملن ٿا، احتساب هر اداري جو ڪرڻو پوندو ٻئي صورت ۾ حڪومت کي ڪارروائي ڪرڻي پوندي. احتساب هر صورت ۾ ٿيندو.
