پرڏيهي آفيس جي ترجمان چيو آهي ته پاڪستان 2021 ۾ شروع ٿيندڙ آمريڪا جي سربراهي ۾ ڊيموڪريسي سمٽ جي عمل جو حصو نه رهيو آهي ۽ هن ڀيري پاڪستان آمريڪا جي دعوت باوجود سربراهه اجلاس ۾ شرڪت نه ڪرڻ جو فيصلو ڪيو آهي.
آمريڪا طرفان ٻي ڊيموڪريٽڪ سمٽ ۾ شرڪت جي دعوت بابت ميڊيا جي سوالن جا جواب ڏيندي پرڏيهي آفيس جي ترجمان چيو ته پاڪستان خطي ۾ امن، استحڪام ۽ خوشحالي لاءِ آمريڪا سان لاڳاپن کي وڌيڪ مضبوط بڻائڻ لاءِ پرعزم آهي. .
ترجمان ممتاز زهرا چيو ته سمٽ جو عمل هاڻي ترقي جي مرحلي ۾ آهي، تنهن ڪري، پاڪستان جمهوري اصولن ۽ قدرن کي هٿي ڏيڻ، مضبوط ڪرڻ، انساني حقن کي اڳتي وڌائڻ ۽ بدعنواني خلاف وڙهڻ لاءِ ڪم ڪرڻ لاءِ آمريڪا ۽ سربراهه اجلاس جي شريڪ ميزبانن سان ٻه طرفي رابطي ۾ رهندو.
هن چيو ته 29 ۽ 30 مارچ 2023ع تي منعقد ٿيندڙ جمهوريت لاءِ ٻئي سربراهه اجلاس ۾ پاڪستان کي شرڪت جي دعوت ڏيڻ تي آمريڪا ۽ شريڪ ميزبان ملڪن جا شڪرگذار آهيون.
هن چيو ته هڪ متحرڪ جمهوريت جي حيثيت سان پاڪستان جي عوام جي جمهوري قدرن سان گهري وابستگي آهي ۽ پاڪستانين جي نسلن وقت به وقت جمهوريت، انساني حقن ۽ بنيادي آزادين تي پنهنجو عمل برقرار رکيو آهي.
ترجمان چيو ته اسان آمريڪا سان پنهنجي دوستيءَ جو قدر ڪريون ٿا، هڪ اهڙو تعلق جيڪو بائيڊن انتظاميه تحت مضبوط کان مضبوط ٿيو آهي.
پرڏيهي آفيس جي ترجمان چيو ته هن مهيني قوم 1973ع جي آئين جي 50هين سالگرهه ملهائي رهي آهي، جيڪو پاڪستان ۾ جمهوري سياست جو سرچشمو آهي.
