ڪراچي: (رپورٽر) ڪراچي ۾ تيز رفتار ڪار فُٽ پاٿ تي ستل ماڻهن مٿان چڙهي وئي جنهن جي نتيجي ۾ 2 ڀائرن سميت 3 ڄڻا چيڀاٽجي فوت ٿي ويا جڏهن ته 2 ڄڻا زخمي ٿي پيا.
ناگن پل ڀرسان تيز رفتار ڪار فُٽ پاٿ تي سُتل ماڻهن مٿان چڙهي وئي، پوليس موجب حادثي ۾ 9 ورهين جو اشوڪ سندس ڀاءُ بليرام ۽ شيري فوت ٿي ويا. جڏهن ته لالي ۽ سيتا رام باگڙي زخمي ٿي پيا.
پوليس جو وڌيڪ چوڻ آهي ته ڪار جو ڊرائيور نشي ۾ هو، واقعي کان پوءِ ٻه ڄڻا ڪار ڇڏي فرار ٿي ويا. فوت ٿي ويل ٽنهي ڄڻن جا لاش اوڏيرو لال اسٽيشن ڀرسان ڳوٺ پير عامر غوث پهچڻ تي گهر ۾ روڄ راڙو مچي ويو. وارثن جوابدارن جي گرفتاري جو مطالبو ڪري ڇڏيو آهي.
وارثن جو چوڻ آهي ته حادثي ۾ هڪ ئي گهر جا 3 ڀاتي فوت ٿي ويا آهن جڏهن ته ٻن زخمين جي حالت ڳڻتي جوڳي آهي، اسان غريب آهيون انصاف ڪيو وڃي.
حادثي ۾ زخمي ٿيل ٻڌايو ته اسان 6 ڀائر آهيون ڏينهن جي وقت ٺيلهي تي فروٽ ۽ سبزي وڪرو ڪري گذر سفر ڪندا آهيون. واقعي وقت سمورا ڀائر فُٽ پاٿ تي ستل هئا.
