اسلام آباد: (اربع: 20 مارچ 2024ع) عالمي مالياتي اداري آءِ ايم ايف اسٽاف ليول معاهدي کان پوءِ جاري ڪيل پڌرائي ۾ چيو آهي ته پاڪستاني اختيارين بجلي ۽ گيس جون قيمتون وقت تي وڌائڻ جو واعدو ڪيو آهي.
آءِ ايم ايف طرفان جاري ڪيل پڌرائي ۾ چيو ويو آهي ته پاڪستان جي معاشي ۽ مالي صورتحال ۾ بهتري آئي آهي. بهتر پاليسي مينجمينٽ سبب معاشي گروٿ ۽ اعتماد بحال ٿيو آهي. اميد آهي ته پرائمري بيلنس 401 ارب روپين تائين رهندو ۽ اميد آهي ته پرائمري بيلنس معيشت جو 0.4 سيڪڙو رهندو.
آءِ ايم ايف پڌرائي ۾ چيو ويو آهي ته هن سال ترقي معمولي رهڻ جي اميد ۽ مٽاسٽا حدف کان ڪافي وڌيڪ آهي. اقتصادي ڪمزورين کي منهن ڏيڻ جي لاءِ جاري پاليسي ۽ اصلاحات جي ضرورت آهي.
پڌرائي موجب پاڪستاني اختيارين ٽيڪس بيس ۾ اضافي تي ڪاربند آهن ۽ پاڪستاني اختيارين بجلي ۽ گيس جون قيمتون وقت تي وڌائڻ جو واعدو ڪيو آهي. توانائي جون قيمتون وڌائي گردشي قرض ۾ اضافو روڪڻ جو ارادو ظاهر ڪيو آهي.
پڌرائي ۾ وڌيڪ چيو ويو آهي ته مهانگائي ۾ ڪمي جي لاءِ اسٽيٽ بينڪ وياج جي شرح برقرار رکڻ جو چيو ويو آهي جڏهن ته اسٽيٽ بينڪ غير ملڪي ڪرنسي مارڪيٽ ۾ شفافيت رکندو.
