پشاور جي علائقي قصا خواني بازار جي جامع مسجد ۾ جمعي جي نماز دوران آپگهاتي ڌماڪي جي نتيجي ۾ 56 ڄڻا شهيد ٿي ويا.
پوليس موجب ڌماڪو قصا خواني بازار ۾ ڪوچا رسالدار جي جامع مسجد ۾ ٿيو، آپگهاتي حملي آور مسجد ۾ گهڙي پاڻ کي ڌماڪي سان اڏائي ڇڏيو.
آپگهاتي بمبار مسجد ۾ داخل ٿيڻ کان اڳ پوليس اهلڪارن ۽ ٻين نمازين تي فائرنگ به ڪئي.
اکين ڏٺن شاهدن موجب حملي آور پاڻ کي منبر سامهون اڏايو ۽ ڌماڪي کانپوءِ مسجد جي هال ۾ هر پاسي انساني عضوا پکڙجي ويا.
مارجي ويلن جا مڙهه ۽ زخمين کي ليڊي ريڊنگ اسپتال نيو ويو، اسپتال جي ترجمان موجب ڌماڪي ۾ 56 ڄڻا شهيد ٿيا ۽ 194 زخمي اسپتال آندا ويا آهن.
سندس چوڻ هو ته زخمين کي طبي سهولتون ڏنيون ويون آهن ۽ دوائن، طبي عملي ۽ رت جي فراهمي کي يقيني بڻايو ويو آهي.
اکين ڏٺن شاهدن جو چوڻ آهي ته ڪارو لباس پاتل آپگهاتي بمبار اڳ ۾ سيڪيورٽي اهلڪارن تي 5 کان 6 فائر ڪيا ۽ پوءِ تيزي سان مسجد اندر داخل ٿيو ۽ پاڻ کي ڌماڪي سان اڏائي ڇڏيائين.
هوڏنهن خيبر پختونخواهه جي خاص مددگار بئريسٽر سيف جو چوڻ آهي ته اطلاع موجب دهشتگردن اڳ ۾ مسجد ۾ گهڙڻ جي ڪوشش ڪئي، انهن جو پوليس سان مقابلو ٿيو ۽ هڪ دهشتگرد مسجد ۾ داخل ٿيڻ ۾ ڪامياب ٿي ويو.
ٻئي پاسي وزيراعظم عمران خان ڌماڪي جي مذمت ڪندي رپورٽ طلب ڪري ورتي آهي.
هن زخمين کي فوري طور طبي امداد فراهم ڪرڻ جي هدايت ڪئي.
