راولپنڊي: آرمي چيف جنرل سيد عاصم منير چيو آهي ته پاڪ فوج جو هر جوان ۽ آفيسر سياسي تعصبن کان مٿانهون ٿي پنهنجي فرضن کي اوليت ڏئي ٿو.
آءِ ايس پي آر موجب جنرل هيڊڪوارٽر راولپنڊي ۾ شهيدن ۽ ويڙهاڪن جي اعزاز ۾ تقريب ڪوٺائي وئي.
آرمي چيف جنرل سيد عاصم منير پاڪ فوج جي آفيسرن ۽ جوانن کي آپريشنز دوران بهادري ۽ قوم لاءِ شاندار خدمتون سرانجام ڏيڻ تي فوجي اعزازن سان نوازيو.
51 آفيسرن کي اسٽار آف ڊسٽريڪشن (ملٽري)، 22 آفيسرن ۽ جوانن کي بسالت ميڊل ۽ 2 جوانن کي گڏيل قومن جي اسپيشل ميڊل سان نوازيو ويو.
تقريب ۾ پاڪ فوج جي اعليٰ آفيسرن ۽ شهيدن جي خاندانن جي وڏي انگ شرڪت ڪئي.
آرمي چيف چيو ته شهيدن جي فرض ۽ عظيم قربانين سبب اسان آزاد فضا ۾ زندگي گذاري رهيا آهيون.
آرمي چيف چيو ته پاڪ فوج هڪ اداري جي حيثيت سان پاڻ سان جڙيل هر فرد ۽ سندس خاندان کي هميشه ياد رکي ٿي ۽ هڪ خاندان جي حيثيت سان اسان جو لاڳاپو قابل فخر ۽ مثالي آهي.
جنرل سيد عاصم منير ان ڳالهه تي زور ڏنو ته پاڪ فوج جو هر سپاهي ۽ آفيسر علائقائي، لساني ۽ سياسي تعصبن ۽ فرقن جي پرواهه ڪرڻ کانسواءِ پنهنجي فرضن ۽ ذميوارين کي مٿانهون رکي ٿو، مضبوط فوج ئي ملڪ جي سلامتي ۽ اتحاد جي ضامن آهي.
