تحريڪ انصاف جي ڪاوڙيل اڳواڻ عليم خان ترين گروپ ۾ شموليت جو اعلان ڪري ڇڏيو.
سياسي صورتحال ۽ بي اعتمادي رٿ جي حوالي سان تحريڪ انصاف جي ڪاوڙيل اڳواڻ جهانگير ترين اڄ لاهور ۾ اهم مشاورتي اجلاس طلب ڪيو هو، اجلاس جهانگير ترين جي رهائشگاهه تي ٿيو، جنهن ۾ تحريڪ انصاف جي اڳوڻي صوبائي وزير ۽ سينيئر اڳواڻ عليم خان سميت صوبائي اسيمبلي ميمبرن شرڪت ڪئي، جڏهن ته جهانگير ترين لنڊن مان وڊيو لنڪ ذريعي شريڪ ٿيو.
ذريعن موجب اجلاس ۾ 3 صوبائي وزيرن سميت مجموعي طور تي پنجاب جا 19 ميمبر شريڪ ٿيا، ايم اين ايز کي اڄوڪي اجلاس ۾ دعوت نه ڏني هئي، انهن جو اجلاس ڌار طلب ڪيو ويندو.
اڄوڪي اجلاس ۾ نعمان لنگڙيال، اجمل چيما، عبدالحئي دستي، لاله طاهر رنڌاوا، خرم لغاري، چوڌري ياسين، ميان عبدالرئوف، ميان عمران جاويد ۽ ٻيا شريڪ ٿيا.
اجلاس کانپوءِ گڏيل پريس ڪانفرنس ڪندي عليم خان جهانگير ترين گروپ ۾ شموليت جو اعلان ڪيو.
هن چيو ته جهانگير ترين تحريڪ انصاف لاءِ وڏيون قربانيون ڏنيون پر ان سميت سڀني جون قربانيون وساريون ويون.
