بالي ووڊ اداڪار ستيش ڪوشڪ 66 سالن جي ڄمار ۾ اوچتو دل جو دورو پوڻ سبب لاڏاڻو ڪري ويو، افسوسناڪ خبر تي ڀارتي فلم انڊسٽري ۽ مداحن ۾ ڏک جي لهر پکڙي وئي.
مسٽر انڊيا اداڪار جي خانداني ميمبر ميڊيا کي ٻڌايو ته ستيش ڪوشڪ خميس جي صبح دل جو دورو پوڻ سبب فوت ٿي ويو.
ڪيترين ئي فلمن ۾ نظر ايندڙ مشهور ڪاميڊين مبينا طور تي دهلي ۾ پنهنجي هڪ دوست سان ملڻ ويو هو ته کيس طبي مرڪز پهچايو ويو، جتي ڊاڪٽرن کيس مرده قرار ڏئي ڇڏيو.
ستيش ڪوشڪ 1956ع ۾ ڄائو، دهلي يونيورسٽي مان گريجوئيشن ڪئي ۽ بعد ۾ نيشنل اسڪول آف ڊراما ۾ داخلا ورتي.
مسٽر انڊيا، رام لکن، جاني ڀي دو يارو ۽ ٻين فلمن ۾ سندس شاندار ڪردارن لاءِ ڄاتو وڃي ٿو، هن ڪيترين ئي ڪامياب فلمن جي هدايتڪاري به ڪئي، جن ۾ هم آپ ڪي دل ۾ رهتي هين ۽ تيري نام شامل آهن.
سندس وفات جي خبر ٻڌندي ئي مداحن کي صدمو رسيو ۽ تعزيت جو سلسلو شروع ٿي ويو، انوپم کير، منوج باجپائي، اجي ديوگن، نيها ڌوپيا ۽ ٻين ستارن سوشل ميڊيا تي مرحوم اداڪار کي خراج عقيدت پيش ڪيو.
