اسلام آباد (ويب ڊيسڪ) پ پ سينيٽر رضا رباني ايف اي ٽي ايف بل جي حوالي سان اپوزيشن تي تنقيد جي جواب ۾ چيو آهي ته شايد وزيراعظم پاڻ اهو بل ناهي پڙهيو، جيڪڏهن پڙهي ها ته ان جي حمايت نه ڪري ها، ڇو ته بل ۾ سڄي قوم کي مخبر بڻائڻ جي ڪوشش ڪئي وئي آهي.صادق سنجراڻي جي صدارت هيٺ سينيٽ اجلاس ۾ خيالن جو اظهار ڪندي رضا رباني چيو ته ايف اي ٽي ايف بل ۾ ڪاروباري ماڻهن کي واهپيدارن بابت ڄاڻ نه ڏيڻ تي سزا ڏيڻ جي سزا ڏني وئي، جنهن جي نتيجي ۾ مخبري جي رياست جنم وٺندي.سندس موجب بل ۾ اهو چيو ويو ته جاچ آفيسر بنا عدالتي اجازت جي گرفتاري ڪري سگهي ٿو، بل تحت ٺاهي ويندڙ ايگزيڪيوٽو ڪميٽي جي ميمبرن مان ٻن جو واسطو آرمي سان هوندو، جڏهن ته جنرل ڪميٽي ميمبرن ۾ نيب چيئرمين ۽ آرمڊ فورسز جي ٻن ميمبرن کي شامل ڪيو ويو آهي.واضح رهي ته وزيراعظم عمران خان اپوزيشن تي پاڪستان کي ايف اي ٽي ايف جي گري لسٽ مان ڪڍڻ جي حڪومتي ڪوششن ۾ رنڊڪون وجهڻ جو الزام هنيو هو.
