نوابشاهه(رپورٽ دانش حيدر) سنڌ ترقي پسند پارٽي پاران سنڌ جي ڏنگي ۽ ڀنڊار ٻيٽن تي وفاق پاران قبضو ڪرڻ واري عمل خلاف شاھنواز ڪيريو، ٻڍل مگسي، رستم شاھه ۽ ٻين جي اڳواڻي ۾ نوابشاهه پريس ڪلب ٻاهران احتجاجي مظاهرو ڪندي چيو ته عمران خان جي وفاقي حڪومت سنڌ جي ٻيٽن ڏنگي ۽ ڀنڊار تي قبضي ڪرڻ جو فيصلو ڪيو آهي جنھن جي اسان سخت لفظن ۾ مذمت ڪيون ٿا، ھنن چيو ته آئيني ۽ قانوني طور سنڌ جا سامونڊي ٻيٽ سنڌ جي ملڪيت آهن ۽ انھن تي ماھيگيرن جو تاريخي حق آھي، ھنن چيو ته هن شيطاني منصوبي جي ڪري مقامي ماهيگير برادري جي زندگين ۽ معيشت تي انتهائي منفي اثر ٿيندا ۽ ان منصوبي تحت لڳ ڀڳ 8 لک مهاڻا پنهنجي تاريخي روزگار مان بيدخل ٿي غربت، بک ۽ بدحالي جو شڪار ٿي ويندا، ھنن چيو ته ٻيٽن تي وفاقي حڪومت جي قبضي خلاف سنڌ ترقي پسند پارٽي پاران 11 آڪٽوبر تي ڪراچي ۾ لکين سنڌي گڏ ٿي پنھنجو احتجاج رڪارڊ ڪرائيندا، ھنن مطالبو ڪيو ته اهڙي قسم جا غير آئيني قدم کڻڻ کا پرهيز ڪئي وڃي ۽ انهن ٻيٽن تي ماهيگيرن جا حق تسليم ڪندي انهن تي ڪنهن به قسم جي اڏاوت تي پابندي لڳائي وڃي.
