اپوزيشن جماعتن حڪومت خلاف بي اعتمادي رٿ آڻڻ جو فيصلو ڪري ڇڏيو.
ذريعن موجب نواز شريف جي صدارت هيٺ ن ليگ جي سينٽرل ايگزيڪيوٽو ڪميٽي ۾ حڪومت خلاف بي اعتمادي رٿ معاملي جي منظوري جو امڪان آهي، جنهن کانپوءِ ان حوالي سان پ پ کي آگاهه ڪيو ويندو.
ذريعن جو چوڻ آهي ته اهو طئي ٿيڻ باقي آهي ته رٿ اڳ ۾ وزيراعظم خلاف آندي ويندي يا قومي اسيمبلي اسپيڪر خلاف پيش ڪئي ويندي.
ذريعن موجب مولانا فضل الرحمان سان ڳالهه ٻولهه کانپوءِ بي اعتمادي رٿ جي حڪمت عملي طئي ٿيندي ۽ بي اعتمادي رٿ تي هڪ موقف اختيار ڪرڻ کانپوءِ رابطا شروع ڪيا ويندا.
ذريعن جو چوڻ آهي ته پ پ کي ق ليگ سان رابطو ڪرڻ جو ٽاسڪ ڏنو ويندو ۽ جهانگير ترين جي حمايت 6 ايم اين ايز سان به پ پ ڳالهه ٻولهه ڪري سگهي ٿي، جڏهن ته جهانگير ترين سان مخدوم احمد محمود اڳ ئي رابطي ۾ آهي.
ذريعن موجب حڪومت جي ڪاوڙيل ميمبرن مان ڪجهه جو واسطو پنجاب ۽ ٻين جو خيبر پختونخواهه سان آهي.
هوڏانهن ذريعن جو چوڻ آهي ته ايم ڪيو ايم ۽ ق ليگ جا معاملا به طئي ٿي ويا آهن ۽ جلد ٻنهي جماعتن جي اڳواڻن ۾ ملاقات ٿيندي.
ان کانسواءِ آصف علي زرداري به ق ليگ سربراهه چوڌري شجاعت جي عيادت لاءِ وٽس ويندو.
