ڪراچي سنڌ حڪومت سڄي صوبي ۾ سموريون يونيورسٽين، ڪاليجن ۽ سمورن اسڪولن سميت سرڪاري آفيسون به بند ڪرڻ جو اعلان ڪري ڇڏيو آهي.
سنڌ جي وڏي وزير جي صدارت هيٺ ڪورونا ٽاسڪ فورس جو اجلاس ٿيو جنهن ۾ فيصلو ڪيو وي ته سرڪاري آفيسون، اسڪول، ڪاليجز ۽ ٻيا تعليمي ادارا بند ڪيا ويندا. سنڌ جي وڏي وزير سيد مراد علي شاهه سمورا تعليمي ادارا ۽ سرڪاري آفيسون بند ڪرڻ جو اعلان ڪندي چيو ته سرڪاري ملازم گهرن مان ڪم ڪندا، ۽ سيڪريٽريز پنهنجي ضروري اسٽاف آفيس گهرائيندا.
اجلاس کان پوءِ ڪانفرنس ڪندي سنڌ جي وڏي وزير سيد مراد علي شاهه جو چوڻ هو ته ڪورونا صورتحال ۾ اسان اسپتالن جي سهولتن ۾ واڌ ڪئي، سنڌ ۾ هن وقت ڪورونا جي مثبت ڪيسن جي شرح سڀ کان گهٽ آهي ۽ صحتياب مريضن جي شرح 94 سيڪڙو آهي جڏهن ته پاڪستان ۾ اِها ئي شرح 84 سيڪڙو آهي. اهڙيءَ طرح پاڪستان ۽ خيبرپختونخواهه ۾ ڪورونا سبب فوتگين جي شرح 2.7 جڏهن ته سنڌ ۾ 1.75 سيڪڙو آهي. ان سڀ جي باوجود اسان گهٻرايل ۽ پريشان آهيون. گذريل 7 ڏينهن ۾ سنڌ ۾ ڪورونا مثبت ڪيسن جي شرح ۾ واڌ ٿي آهي. اهڙي طرح اسان جي صوبي ۾ به فوتگيون وڌيون آهن. نيشنل ڪوآرڊينيشن ڪميٽي جي گذريل اجلاس ۾ سنڌ بين الصوبائي پبلڪ ٽرانسپورٽ تي پابندي جي تجويز رکي هئي جيڪا نه مڃي وڱئي، اسان چيو هو ته وفاقي حڪومت بندوبست ڪندي ته اسان ڪنداسين.
